މިއީ ވަރަށް ގިނައިން އަންހެން
ކުދިންގެ ފަރާތުން އިވޭ ވާހަކަތަކެވެ. އެމީހުން މަސައްކަތް ކުރާ އޮފީސް ނުވަތަ
އިދާރާތަކުގައި މަސައްކަތްކުރާ ފިރިހެނުންގެ ފަރާތުން ތަފާތު ޖިންސީ ގޯނާ ލިބޭ
ކަމުގެ ވާހަކަތަކެވެ. މިގޮތަށް މި ޢަމަލު ހިންގާ މީހުންގެ ތެރޭގައި އެތަނެއްގައި މަސައްކަތްކުރާ ތަފާތު
ގިންތީގެ މީހުން ހިމެނެއެވެ. އާންމުކޮން މި ޢަމަލު ހިންގަނީ ލިޔެކިއުންތަކުގައި
ސޮއި ކުރަން ދާވަގުތު ތަކުގަޔާއި،
ކެއުމަކަށް ނުވަތަ ކޮފީއަކަށް ދައުވަތު ދީގެންނާއި އަދި މެސެޖުގެ
ޒަރީއްޔާއިންނެވެ. ލިޔެކިއުން ތަކުގައި ސޮއި ކުރަން ދާވަގުތު ތަކުގައި ނޭގޭކަމަށް ހެދިގެން
ހުރެފައި ގަސްތުގައި އަތުގައި އަތްލުމާއި ގައިގައި ބީހިލުން ފަދަ
ކަންތައްތައް ކުރުން ހިމެނެއެވެ.
މިއީ ކޮންމެ އަންހެން
ކަނބަލަކުވެސް ވަރަށް ބޮޑަށް ވިސްނަށް ޖެހޭ ކަމެކެވެ. އަދާ ކުރާ ވަޒީފާ ގެއްލިދާނެ
ކަމުގެ ބިރުންނާއި އަދި މަގާމުގެ ކުރިއެރުން ނުލިބި ދާނެ ކަމުގެ ބިރުން މިކަމުގެ
ޝިކާރަޔަކަށްވެ، މިކަމުން ސަލާމަތް ވުމަށް ނުކުޅެދޭ ހިސާބަށް ދަންދެން މިކަން
ސިއްރުކޮށްގެން ހުރުމަކީ ވަރަށް ނުރައްކާތެރި ކަމެކެވެ.
2010 ނޮވެމްބަރ މަހު، އިންފޮރ
މޭޝަން ޓެކޮނޮލޮޖީ ދާއިރާގައި މަސައްކަތް ކުރާ 600 އަންހެނުންގެ މެދުގައި ހެދި ދިރާސާ
އަކުން ދައްކާ ގޮތުގައި އެތަނުގައި މަސައްކަތް ކުރާ 88% އަންހެނުނަށް، އެތަނުގައި
މަސައްކަތްކުރާ ފިރިހެނުންގެ ފަރާތުންވަނީ ޖިންސީ އަނިޔާވެރިކަމާއި ކުރިމަތި
ލާންޖެހިފައެވެ.
މިކަމުން ސަލާމަތްވުމަށް
ކުރެވިދާނެ ކަމަކީ ކޮބާ؟
ކޮންމެ އަންހެނަކުވެސް
އެމީހަކު މަސައްކަތްކުރާ ތަނުގައި ހެދިފައިވާ ގަވާއިދުތަކަށް އަހުލުވެރި ވުމަކީ
ވަރަށް މުހިންމު ކަމެކެވެ. މިފަދަ ޢަމަލުތައް ހިންގާ ފަރާތްތަކަށް އަދަބު ދެވޭ
ގޮތާއި އެކަންތައް ކަމާއި ބެހޭ އިދާރާތަކަށް ރިޕޯޓްކުރާނެ ގޮތް ދަސްކޮށް އެކަމަށް
އަހުލުވެރި ވުމަކީވެސް ވަރަށް މުހިންމު ކަމެކެވެ. މަސައްކަތުގެ މާހައުލުގައި އުޅޭ އެކުވެރި
ރައްޓެހިންނާއި ދިމާވާ ކަންތައް ހިއްސާކޮށް އެކަމަށް ކެރިގެން ކުރިމަތިލާމީހަކަށް
ވުމަކީވެސް ވަރަށް މުހިންމު ކަމެކެވެ. މީގެ އިތުރުން ތިރީގައި މިވާ ބައެއް
ކަންތަކަށް ހާއްސަ ސަމާލުކަމެއް ދިނުމަކީވެސް ވަރަށް މުހިންމު ކަމެކެވެ.
1.
ކުރާކަންތަކާއި މެދު ހިތްހަމަނުޖެހޭކަން އެއްވެސް ޖެހިލުމެއްނެތި ބުނާ
މީހަކަށްވުން؛ މިއީ ވަރަށް
މުހިންމުކަމެކެވެ. ކިތައްމެ މަތީ މަގާމެއްގައި ހުރި މީހެއްގެ ފަރާތުންވެސް މިފަދަ
ކަންތައް ކުރިމަތިވާނަމަ، އެކަމާއި ހިތްހަމަ ނުޖެހޭކަން ބިރުން ނުހުރެ ބުނާށެވެ. މާބޮޑަށް
ގަޔާވާން މަސައްކަތް ކުރާހެން ހީވާނަމަ، ދުރަށް ޖެހޭށެވެ. ޢަމަލާއި ބަހުން
ހިތްހަމަ ނުޖެހޭކަން ހާމަކުރާށެވެ. ތިމާ ހަށިގަނޑުގެ އެއްވެސް ގުނަވަނެއްގައި
އަތްލާ ހަދާނަމަ ނުވަތަ ވާހަކަ ދައްކާއިރު ކޮޑުމަތީގައި އަތްލާ ހަދާނަމަ، އެކަމުގެ
ސަބަބުން ވަރަށް އުދަގޫވާ ކަމާއި ގައިގައި އަތްނުލުމަށް ބުނާށެވެ. މަޖަލަކަށް
ހަދައިގެން ނަމަވެސް ހަޑިހުތުރު އިބާރާތުން ލިޔެފައިވާ މެސެޖު އީމެއިލް ނުވަތަ ފޯނަށް ފޮނުވާ ހަދާނަމަ، ފުރަތަމަ ދުވަހުން ފެށިގެން މެސެޖު
ފޮނުވުން ހުއްޓާލުމަށް އަންގާށެވެ.
2.
މިގޮތަށް ކުރާ ކަންތައްތަކުގެ މަޢުލޫމާތު އެއްކުރުމަށް ފަހު އެކަމުގެ ރިކޯރޑް
ބެލެހެއްޓުން؛ ކުރާ ކަންތައް ތަކުގެ
މައުލޫމާތު އެއްކޮށް އެކަންތައް ތަކުގެ ހެއްކާ ގަރީނާ ނުގެއްލޭ ގޮތަށް ރައްކާ
ކޮށްފައި ބެހެއްޓުމަކީ ވަރަށް މުހިންމު ކަމެކެވެ. އޭރުން އެކަމާއި ގުޅޭ ރިޕޯރޓެއް
އެކުލަވާ އިރުވެސް ބޭނުންވާ މައުލޫމާތު ފަސޭހައިން ލިބެން ހުންނާނެއެވެ. މިގޮތަށް
ހެއްކާ ގަރީނާ އެއްކުރާއިރު، އެކަމެއް ހިގި ދުވަހާއި ތަނާއި ވަގުތާއި ގަޑި އެގެން
އޮތުމަކީވެސް ވަރަށް މުހިންމު ކަމެކެވެ.
3.
އިތުބާރު ހިފޭ ފަރާތަކާއި ދިމާވާ ކަންތައް ހިއްސާކުރުން؛ އޮފީސް މާހައުލުން އިތުބާރު ހިފޭ ގާތް އެކުވެރިޔަކާއި
ދިމާވާ ކަންތައް ހިއްސާކުރާށެވެ. އޭރުން އޭނަޔަށްވެސް، އެމީހަކު ތިމާއާއި މެދު މުއާމަލާތްކުރާ
ގޮތާއި ހިންގާ ނޭދެވޭ ޢަމަލުތައް އިތުރަށް ބެލުމުގެ މަގު ތަނަވަސް ވެގެންދާނެއެވެ.
އެހެން މީހުންގެ ފަރާތުންވެސް އޭނަގެ އެ ޢަމަލުތައް ފެންނަކަމަށް ބުނާނަމަ އެއީ
ތިމާއަށް މިކަމުގައި ކުރިޔަށް ދިއުމަށް ލިބޭ އިތުރު ހިތްވަރެކެވެ.
4.
ވާހަކަ ދައްކައިގެން ހައްލު ނުވެއްޖެނަމަ ރަސްމީސިފައެއްގައި ކަމާބެހޭ
ފަރާތަށް މައްސަލަ ހުށަހެޅުން؛ ކުރާ ކަންތައް
ހުއްޓާލުމެއްނެތި ކުރިޔަށް ގެންދާނަމަ، ރަސްމީ ކޮން ކަމާއި ބެހޭ ފަރާތަށް މައްސަލަ ހުށަހަޅާށެވެ.
5.
ކަމުގެ ކުޑަބޮޑު މިނަށް ބަލާފައި ދެވަނަ ވިސްނުމަކަށް ދިއުން؛ އުޅޭ ވަޒީފާ ދޫކޮށް ލުމަކީ އެންމެ ފަހުގެ ކަމަކަށް
ހަދާށެވެ. ވަޒީފާ ދޫކޮށްލުން އިހުތިޔާރު ކުރާނަމަ، އެހެން ވަޒީފާ އެއް
ހޯދުމަށްފަހު ވަޒީފާއިން ވަކިވުމަކީ ވަރަށް މުހިންމު ކަމެކެވެ. ތިމާ އަދާކުރާ
ވަޒީފާ ދޫކޮށްލުމަކީ މިކަމުގެ ހައްލެއް ނޫނެވެ. ހައްލަކީ ކެރިގެން މިކަމުގައި
ކުރިމަތިލުމެވެ.
އަޅުގަނޑުމެންގެ ދިވެހި ރާއްޖޭގައިވެސް ވަނީ ޖިންސީ ކުށުގެ ޤާނޫ (ޤާނޫނު ނަމްބަރ:
17/2014 ) އާއި އަދި ޖިންސީ ފުރައްސާރަ ކުރުމާއި
ގޯނާކުރުން ހުއްޓުމުގެ ޤާނޫނު (ޤާނޫނު ނަމްބަރ: 16/2014 ) ހެދި ރައީސުލް
ޖުމްހޫރިއްޔާ ތަޞްދީޤު ކުރައްވާފައެވެ. ވީމާ މި ޤާނޫނަށް ހުރިހާ މީހުންވެސް
އަހުލުވެރިވުމަކީ ވަރަށް މުހިންމު ކަމެކެވެ. އޭރުން މުޖުތަމަޢުގައި ހިނގާ މިފަދަ
ނޭދެވޭ ޢަމަލުތައް ހުއްޓުވަން ލިބޭ އިތުރު ހިތްވަރަކަށް ވެގެން ދާނެއެވެ.

No comments:
Post a Comment